中環出更：周庭鄧家彪被登記做檢測
政府推行全民檢測計劃漏洞多多，由於網上預約系統只需輸入身份證及電話號碼即可進行預約，不設身份核對機制，至今已爆出逾百宗涉盜用他人身份資料預約事件，而最新又有兩個中招，分別係前香港眾志成員周庭及立法會前議員鄧家彪（阿彪），佢哋尋日先後喺社交平台貼文，話畀人盜用個人資料，登記做全民檢測喎。不過佢哋唔同嘅係，一個冇諗過去做，一個就畀人重複登記。
一個唔會去 一個已檢測
周庭喺社交平台貼文，話前日收到政府提示短訊，提醒佢今日要去大角咀體育館接受檢測，仲上載有關短訊截圖做證明，但佢根本就冇登記！周庭話收到短訊第一時間覺得好奇怪，估唔到自己「被預約」，仲話唔講仲以為係建制派搞緊簽名活動，諷刺計劃有篤數之嫌，有十三億人參加，佢都會信咁話。
唔知阿彪係咪想幫建制伸冤，佢隨即都圖文並茂咁喺社交媒體出貼，話其實佢都有畀人冒認身份去登記檢測，又指自己明明本月一日做完檢測，翌日就出結果，結果再隔一日竟然收到短訊，發現有人幫佢再預約，而阿彪亦已就事件報警要求追查。照咁睇嚟，被盜用個人資料登記全民檢測真係無分政見喇。
卓妮