院舍送走智障兒 悲劇家庭墮深淵

做人難,做窮人難,在香港做基層更難,政府漠視民生疾苦,社會福利資源長期短缺,好多老人及特殊院舍都唔夠宿位,等到死都住唔到,有啲只准住一段時間,到時到候就踢你走,叫你返屋企搵屋企人照顧,大哥,有頭髮邊個想做瘌痢,屋企照顧到就唔使住院舍啦,踢人走即係任由呢個家庭束手無策,自生自滅,呢,日前就發生一單四十六歲媽媽涉嫌親手殺死廿一歲智障兒子!

呢個住喺葵涌邨嘅家庭,一家五口,其中一對十三歲子女仲係「龍鳳胎」,本來係好幸運,可以好幸福,但天意弄人,大仔有中度智障,需要特別照顧,所以安排住喺院舍。阿媽好錫個仔,不時煲湯帶畀佢飲,咁捱吓捱吓,個仔都廿一歲大,可惜仲唔識自己大小便,要長期着紙尿片,而且成日拍枱拍櫈,要靠安眠藥先瞓得着!喺院舍住就話有專業人士睇住,但係好景不常,到咗呢個年紀此處不留人,要返番屋企住,咁就揭開悲劇序幕!

大家諗吓,一歲小朋友咁樣都難照顧啦,更何況廿一歲有氣有力,媽媽弱質纖纖,又冇受過訓練,再加上要睇住另一對未成年子女,心力交瘁,壓力爆煲,個仔搬番屋企五日,有人夜晚失控用膠枱布紮成繩索將個仔勒死,再企圖自己割脈自殺,更不幸嘅係,呢個血淋淋嘅兇案,屋企人見到報警求助,相信眼前呢幾幕喺弱小心靈會留下不可磨滅嘅陰影!

男戶主據講情緒低落,十分疲倦,真係要撐住,仲要獨力肩負照顧一對龍鳳胎子女,相信以後段路都好難走。依家新冠肺炎疫情好多社福機構受到限制,上門服務更加買少見少,屋企人要照顧老弱,又要抗疫,雙重壓力,喺屋企好似困獸鬥,真係人都癲!議員睇唔過眼,話只要政府做多啲嘢,畀啲「喘息空間」服務,例如暫託照顧幾日,等照顧者有得休息,就可以減少類似悲劇發生嘅可能性,但冇靈魂政府又點聽得入耳?

喺一個正常社會,人人安居樂業,母慈子孝,係普通過普通嘅事,但喺特區就上演母倦子亡嘅悲劇。政府管治呢廿三年,香港演變成扭曲咗社會,後生仔價值觀扭曲,所以反中亂港成為佢哋「核心價值」;官場文化亦係變形得好犀利,以為推行問責制幾咁巴之閉,點知仲閉翳,變咗卸責制,今次悲劇發生,就係因為制度上嘅冷漠,不聞不問,將院舍人士推番畀冇力照顧嘅家庭,理得你死,警方拉咗涉嫌行兇嘅婦人,其實本身都係社會嘅受害者,如果有得揀,梗係追究邊個將不幸家庭推向深淵,問題係,大家有得揀咩?