政情：泛民區會又爆分裂 西貢3議員退出「將民關」

聲明指，佢哋四人即日起辭退「將民關」所有職務，又提到佢哋最近一直努力檢視自身地區工作，經多番思考後，認為區務繁重，無暇兼顧會務工作，加上組織內有唔少矛盾至今仍未解決，故決定即日退出「將民關」。我哋嘗試聯絡王卓雅、李賢浩同李嘉睿，其中王卓雅透過辦事處話無回應。

柯耀林：選舉前後多人出入

身兼「將民關」主席嘅西貢區議員柯耀林回應查詢時，話自己喺下晝約三時收到四人電郵通知退出「將民關」，又話呢個組織成立咗二十年，過去都有好多人加入同離開，認為佢哋四人今次退出係好普通嘅事，唔覺得奇怪。被問到四人話組織內有唔少矛盾時，柯就話大家事前並無爭拗，但就話組織其實係好鬆散，想合作就合作。

至於未來仲會唔會有合作空間？柯就話要睇議題，舉例話如果喺區議會傾一啲涉及全區性嘅議題，例如係有關衞生防護等，當然可以合作。咁擔唔擔心會有其他「將民關」成員跟住退出？柯就話呢啲事擔心唔嚟，仲話喺選舉前後有好多人出出入入添！

曾與民主黨內訌致退黨潮

查實向來係民主派票倉嘅新界東，過去一直係「多事之區」，對上一次爆發內訌要數到二○一八年民主黨（白鴿黨）新界東支部嘅「雙牌頭事件」。事緣「將民關」同白鴿黨喺西貢都善選區出現「撞區」，事後白鴿黨將「將民關」列為「參政團體」，唔再容許該黨中人同時擔任呢兩個組織嘅成員，最終觸發包括當時仍然係白鴿黨資深黨員嘅柯耀林在內，共五十九人宣布退黨。