中環出更：疫情改變習慣 方黃吉雯食晏買埋晚餐
疫情之下，禁聚令放寬收緊，不停有變數，令市民無所適從，無論工作或生活上的模式都隨之而改變。正如健康快車香港基金創會主席方黃吉雯咁，佢話已經習慣咗買外賣嘞！
話說日前下晝四點幾喺中環太子大廈遇見方黃吉雯，當時見佢抽住個袋，問到佢去邊呀？佢話啱啱食完飯冇幾耐，順便買埋外賣今晚食。依家放寬咗唔出去食？佢話平時差唔多日日都出街食，自己好少煮飯，自從疫情緊張之後，夜晚就好少出去食，搞到依家成日食完午飯，都諗住要買埋夜晚嗰餐外賣返屋企。
劉健儀停飯敍 適應留家生活
喺差唔多時間見到立法會前議員劉健儀由太子大廈落遮打道，邊行邊睇訊息又打埋電話，好似好忙咁。行到香港會對開等車時，卓妮上前同佢打招呼，問佢近排點樣？佢話工作上就冇咁忙，但好多文件要客人上律師樓簽名，但有部分客人喺外國嚟唔到，所以要諗其他辦法去處理。自己嘅生活就好大改變，平時自己鍾意約埋三五知己，去行街食飯，但疫情之後，好多時都留喺屋企，久而久之反而習慣咗，所以話人嘅適應力幾強。
卓妮早幾日喺中環ifc見到議員廖長江嘅太太廖王沛詩，當時佢一個人喺商場度行嚟行去，好似搵緊嘢咁，冇幾耐佢行咗入一間餅舖，快速買咗包餅離開。離開時問佢買包餅自己食？佢話當時係趕住去開會，如果肚餓咪食少少囉、順便幫襯吓香港店舖。再問佢疫情之下自己生活模式係咪改變咗？佢話都會（口架），一般嘅應酬都減少，夜晚就返屋企食飯，佢仲話期望疫情可以快啲過去，咁就大家都開心啦！
卓妮