政情：馮煒光賣海怡半島單位 賺近400萬
疫情之下，經濟前景充滿不明朗因素，甚至有業主看淡後市沽貨離場，當中包括前新聞統籌專員馮煒光，佢上月下旬就以九百五十萬元賣出南區海怡半島嘅低層三房單位，帳面賺近四百萬元。
根據土地註冊處顯示，該單位係馮煒光於二○一一年十月，以五百五十五萬元買入，實用面積六百二十三平方呎，現時成交價為九百五十萬元，呎價一萬五千二百四十九元，帳面賺三百九十五萬元，升值近約七成。
其實馮喺海怡半島曾經有兩個「磚頭」揸手，但另一個低層單位已喺二○一七年以一千一百八十三萬賣出，實用面積七百三十九平方呎，帳面賺八百三十八萬元。
套現買大屋與家人同住
馮煒光接受查詢時話，都有少少唔捨得海怡半島，因為都住咗好耐，賣樓係希望有多啲錢去買一個大啲嘅單位，讓佢同細佬，以及今年已經八十三歲嘅媽媽一齊住，等大家互相有個照應，不過至今仲未買到合心水單位。