政情：陳日君月餅送囚友告吹

話說陳日君日前喺社交網站貼文，提及今年中秋節正值十月一日，「藍色人會雙重慶祝，在鐵窗後的手足，或許會特別掛念。」

黃之鋒其後喺社交網站貼出海報，話響應陳日君愛心捐月餅活動，又呼籲網友用支票捐款。貼文話佢曾喺牢房度過中秋節，當時亦曾收過陳日君送入監房嘅月餅，令佢好懷念當時嘅甜味。

懲教署拒批申請

但陳日君前日喺社交平台貼文，「因為一些原因，很遺憾地告訴大家今年『愛心捐月餅』不能舉辦了，抱歉這使囚友失望也給懲教處（署）添了麻煩。」佢又話月餅會轉贈畀慈善團體。

據悉，懲教署署長胡英明獲悉後，認為有人將捐贈月餅畀囚友變得政治化，故今年拒絕陳日君嘅申請，不過仍會接受其他慈善團體捐贈，每名囚友將獲得一個月餅。