政情：高官執位 羅淑佩管運輸署惡啃 盧世雄掌工貿署頭痕

羅淑佩作為現任政制及內地事務局副秘書長，處理過唔少政治敏感事件。早前法院裁定傳媒有權查閱選民登記冊，而羅其後就去信法院，話只係容許喺政府新聞處登記嘅記者查閱名冊。早前羅亦有出席立法會政制事務委員會會議，回應議員就去年區議會選舉嘅提問。而喺二○一六年特首選舉期間，有一部存有三百萬名選民資料嘅電腦失竊，羅亦有份出席記者會交代。

港交通問題多 如燙手山芋

對於運輸事務，羅淑佩並非一無所知，因為佢喺二○○七至二○○九年曾經出任環境運輸及工務局首席助理秘書長（運輸），但始終都係十幾年前出任有關職位，時代都大變喇。不過冇變嘅係運輸署一直都倒瀉籮蟹。參考上一任運輸署署長陳美寶嘅「政績」，其任內工程「中環灣仔繞道」啟用前，就已經被揭發隧道內有多條裂紋，嚴重滲水，危害使用者安全，啟用後更頻頻大塞車，要叫埋警方幫手指揮交通先至搞得掂。

每逢打風落雨嘅時候，例牌會大塞車，但運輸署始終未能夠吸取經驗妥善協調。青嶼幹線係其中一個大塞車位，一直有議員質疑青嶼幹線通車成二十年都塞車，係因為實施雙向收費，車輛經過收費亭要減慢車速，先至導致塞車，但署方依然闊佬懶理。運輸署問題一籮籮，睇嚟羅淑佩接咗呢個燙手山芋之後，要隨時候命，唔使旨意唞喇。

盧世雄則喺二○一二年至二○一四年出任工業貿易署副署長，依家重返舊日嘅工作部門之餘仲要有得坐正。然而今日正值日益惡化嘅中美糾紛，美國不斷向中港施加貿易限制，最新一單就係美國撤銷對香港多方面嘅特殊待遇，美國更要求所有由香港進口嘅貨品，都必須標示為「中國製造」，睇嚟工業貿易署署長一職都係另一個下靶位喇。

譚大鵬坐正 任稅務局局長

而譚大鵬一樣有得坐正，接替即將退休嘅稅務局局長黃權輝。譚早喺一九八六年已經加入政府任職助理評稅主任，之後一路由稅務局助理局長、副局長等一直晉升。公務員事務局局長聶德權話譚大鵬喺稅務管理方面擁有豐富嘅知識同經驗，相信佢可以帶領稅務局面對未來嘅挑戰咁話。