政情：深水埗疫廈恐喉管播毒 何啟明促部門視察
青衣長康邨曾出現多宗新冠肺炎感染個案，當時專家分析同大廈喉管接駁不當，導致漏氣有關，類似嘅情況近日疑似再度出現！深水埗區議員何啟明尋日喺社交平台發貼文，指深水埗鴻裕大廈A座曾經展開喉管更新工程，質疑大廈出現喉管「播毒」，恐怕會步長康邨嘅後塵，準備發起聯署，同埋去信香港大學微生物學系講座教授袁國勇，促請政府部門到場視察。
周邊都有確診個案
何啟明喺Facebook話鴻裕大廈A座嘅部分確診者雖然住喺唔同嘅樓層，不過就喺同一個單位，加上之前大廈曾經展開喉管更新工程，同埋長康邨發生過「喉管播毒」事件，令唔少住戶都質疑喉管嘅安全性。佢大鬧衞生防護中心至今都未有派員去大廈進行環境檢測，又話雖然香港疫情有回落嘅迹象，但鴻裕大廈疫情都有機會繼續蔓延。
佢仲話唔單止鴻裕大廈有確診個案，就連周邊嘅幾幢大廈都有。有見及此，佢促請袁國勇聯同衞生署、屋宇署嘅人員，親自到場視察大廈嘅環境同埋喉管，更深入咁了解點解鴻裕大廈會成為疫廈。