政情：舊式郵筒或移除 郵政路政未傾過
殖民地時代嘅舊式郵筒係香港歷史嘅一部分，但依家嘅數量少之又少。屯門都有個綠色鑄造圓柱形郵筒，但嚟緊好可能因為道路擴建工程而被移除。
青山公路海景花園巴士站有一個殖民地時代嘅綠色郵筒，由佢嘅外表都睇得出歲月悠久。當時嘅郵政部門喺呢個位置裝郵筒，係想方便鄰近居住嘅軍人。但屯門區議員巫堃泰話呢個郵筒可能會面臨被拆除嘅危機，立法會會期結束前，財委會批准撥款擴建青山公路青山灣段工程，而郵筒正位於擴闊路段之上。
巫堃泰話曾經致電郵政署了解會點樣安置郵筒，獲得嘅回覆係「有得保留都想保留」。但巫話根據佢理解，路政署同承建商都從來冇同郵政署就郵筒嘅安排進行商討。