政情：冒疫又未必傾到嘢區會會議紛押後
新冠肺炎疫情肆虐，近日更爆發第三波疫情，前日單日確診人數過百，政府都即刻收緊禁聚令同宣布公務員在家工作一個星期。就連多個區議會嘅會議都押後，荃灣區議會主席陳琬琛都話，疫情來勢洶洶，政府又冇人返工，咁都無辦法（口架）！
民政署秘書處都未必返工
荃灣區議會原定於今日舉行大會，但網頁上就顯示話將會延後再另行通知。陳琬琛接受查詢時指，因為近日本港疫情非常嚴峻，連續兩日單日感染人數創新高，唔少議員都反映好擔心，加上政府宣布公務員在家工作，唔少民政事務總署同秘書處嘅同事都未必返工，所以決定押後會議。佢仲話，就算開得成會，本身要出席會議回應區議員提問嘅政府部門代表都已經改為在家工作，咁樣會議都好難討論落去。
陳琬琛話，為咗顧及議員嘅憂慮，再加埋會議未必傾到嘢，所以索性押後會議。佢仲話問過其他區議會，大家都因為疫情決定押後今個星期嘅會議！除咗荃灣區議會，仲有多區都決定押後原定於本周同下周嘅大會，包括油尖旺、中西區同埋北區等。