政情：議員唔連任 九月底要搬離立會
第六屆立法會會期啱啱結束冇耐，今屆都有唔少議員決定唔連任。立法會秘書處尋日向各位議員發電郵，指一眾唔尋求連任或者不獲連任嘅議員，其辦事處需要喺今屆任期結束前搬離立法會，即係九月三十日，秘書處都會喺短期內向全體議員發通告詳細講解結束辦事處嘅安排。
根據立法會秘書處嘅文件，行政管理委員會喺早前嘅會議上就決定咗，由今屆會期結束，直到換屆選舉結果公布嘅一段時間，議員唔可以使用立法會綜合大樓嘅傳媒設施，包括新聞發布室、記者採訪室、咪兜等。行管會又話，所有議員都唔應該喺立法會綜合大樓內嘅任何地點同傳媒會面，即使唔尋求連任嘅議員都冇得例外。
至於選舉結束後，行管會同意喺選舉結果公布後，候任議員即可使用立法會大樓內為議員提供嘅設施，包括停車場、圖書館、檔案館、二樓嘅兩間等候室、三樓及五樓的會客室、咖啡角、天台花園、議員活動室，以及傳媒設施等等。