疫情又再大爆發，多個大型展覽例如電腦通訊節、書展同動漫節等都要延期，政府亦宣布停止一切大型活動，美容院、健身室同卡拉OK等十二類場所亦要關閉七日，生意損失慘重。老實講，喺過去半年，展覽業陷入冰河時期，係咪單靠抗疫基金嘅資助就捱到落去？最慘嘅係唔知要等到幾時先可以再搞展覽，都唔知捱唔捱到落去，究竟商務及經濟發展局局長邱騰華係咪冇招打救，定係要業界等運到？
