經濟唔好，打工仔為保飯碗，除咗要努力工作，仲可能需要搵啲外快嚟幫補一下收入！喺日本寫真界，有唔少女優都視寫真工作為副業，當中有人係OL出身，有人係藥劑師，今日介紹嘅江藤菜摘亦係一名兼職女優，而佢嘅正職係一位幼稚園教師，唔怪得之阿妹散發着一種柔情似水嘅感覺了。
現時日本寫真界可以話係巨乳女優成群，元祖級巨乳天后有熊田曜子，青春派嘅代表人物就有天木純、寺本莉緒、淺川梨奈等等。如果你鍾情美尻女優，同樣有宮本里緒、竹內涉等女優可供選擇。不過，成日睇波睇籮，睇得多都會悶，咁就啱喇，現年28歲嘅江藤菜摘，就係一位以美腿為賣點嘅姊系女優。講真，呢位姐姐仔嘅美貌未至於驚為天人，但渾身散發一種溫柔韻味，令人感到相當親切。身材方面，菜摘屬於骨肉勻稱型，上圍可能未必符合「胸奴」嘅需要，但係大家不妨將焦點移落佢嘅下半身，原因係大腿夠晒幼，令兩條腿睇起上嚟好修長，難怪被寫真業界形容為「超絕美腳」！
江藤菜摘喺上年以兼職身份加入寫真界，正職係一名保育士，即係我哋所講嘅幼稚園教師，亦因為呢個背景，引嚟不少人注目。值得一提，菜摘姐除咗邊做Miss邊拍寫真，有段日子仲做埋賽車女郎，喺搵銀方面夠晒進取。隨住人氣漸漸提升，呢位姐姐仔明白到自己好難繼續做教師，但係佢依然身兼三職，原因係佢嘅屋企人喺東京赤坂區經營一間酒吧餐廳，所以間唔中都會過去幫手做侍應生，真係活得好充實。喺一次訪問中，菜摘表示自己因為忙得滯，家陣都冇男朋友，而成熟型男士正正係佢杯茶，最好對方每日都會同佢講聲「我愛你」添！咁樣睇嚟，我完全符合晒佢嘅要求喎，Come on baby！
江藤菜摘近期忙於拍寫真，每次影完靚相，都會將一部分放上社交網同大家分享，百無聊賴想養一養眼，自己識做啦！
網址：https://twitter.com/natchaaaan06?lang=ja
年齡：28歲
身高：5呎4吋
三圍：33-23-33
撰文：賢