政情：秘密離港 藏頭露尾 羅冠聰終自爆逃亡到英國
因宣誓風波而被褫奪立法會議員資格嘅前香港眾志常委羅冠聰，喺《港區國安法》生效前突然退出自己一手創立嘅香港眾志，並秘密離開香港。佢出走後繼續「藏頭露尾」，唔肯透露身在何處，但就透過唔同渠道包括出席聽證會唱衰中港，仲公開呼籲各國暫停同香港嘅引渡協議。直至尋晚，佢終於自爆身在英國倫敦。
稱近日選擇低調行事
羅冠聰喺社交網站Facebook話，近日選擇相對低調行事，係希望從唔同渠道先了解、評估風險，再稍作打算，但尋日可以表明會繼續香港抗爭運動嘅國際線工作，繼續講出真相。佢又話近日一直喺公寓內接受唔同嘅訪問，有好公開嘅，亦有好隱密嘅，而佢最大嘅心願係希望香港安康，香港人平安。