政情：不滿屢遭抹黑 結束47年合作關係 警隊終止與港台聯製《警訊》
警隊同港台合作拍攝嘅電視節目《警訊》已有四十七年歷史，但雙方近年關係起波瀾，警隊近月曾多次去信港台，指佢哋製作嘅電視節目經常抹黑警隊。消息指，警隊將喺下月中與港台結束合作關係，由港台拍攝嘅《警訊》最後一集將喺八月十二日播映。
警方話經過同港台商討後，決定喺下月中旬，結束雙方聯合製作嘅《警訊》節目，調撥資源以加強資訊發布嘅靈活性、互動性同時效性。
曾去信斥《頭條新聞》顛倒是非
警方仲話一直致力透過唔同渠道向市民提供防罪資訊，近年科技發展迅速，社交媒體普及，市民接收資訊嘅習慣有所改變，應社會發展，警隊與時並進，積極檢討公關策略，務求提升資訊發布嘅效能。展望未來，警隊會繼續透過唔同嘅平台發布資訊，積極提升市民嘅防罪意識，令更多市民受惠。
警務處處長鄧炳強喺今年三月曾去信港台，指其製作的電視節目《頭條新聞》顛倒是非，當中嘅「驚方訊息」環節更誤導觀眾，令觀眾對警隊產生錯誤看法，有必要作出澄清。