政情:被指違禁聚令 操弄選舉 民主派初選一舊雲長毛料出局

立法會選舉喺九月舉行,民主派日前舉辦初選,有逾六十一萬人投票。民主動力尋日公布初步結果,其中喺九龍西選區中有逾七萬五千人投票,但民主黨現任議員黃碧雲(一舊雲)只取得三千七百六十五票,只佔九龍西選區總票近百分之五,排行第七,預料將會出局。此外,社民連梁國雄(長毛)喺新界東取得八千九百四十四票排第九,料無望重返立法會。

初步結果只計算電子票站,但紙張選票仍點算當中,而電子票中有逾千票為重複點票。根據現時嘅初步結果,民主黨多名現任議員均取得低票,只排行第五、六位,屬於出線尾席或尾二席。

政制局指或違國安法

該黨主席胡志偉喺九龍東取得九千多票,排行第五、議員尹兆堅喺新界西取得約一萬七千票,排行第五、議員林卓廷喺新界東取得約一萬四千票,排行第六、議員涂謹申則喺區議會(第二)取得四萬五千票,排行第四。

政制及內地事務局尋日指政府唔同部門均接獲唔少市民投訴,有投訴指初選活動涉嫌干預、操弄選舉,嚴重擾亂選舉秩序並導致選舉不公;另有市民指有關活動參與人眾,涉嫌違反禁聚令規定;亦有投訴指舉辦單位主張號召贏取「35+」立法會議席後全面否決政府嘅財政預算案以達致「攬炒」目的,該等行為已涉嫌構成《港區國安法》第二十二條所規定嘅顛覆國家政權罪,即以非法手段嚴重干擾、阻擾、破壞中華人民共和國中央政權機關或者香港特區機關依法履行職能。局方強調一經發現有任何違法違規嘅情況,會即時轉介相關執法部門依法查處,必定嚴肅處理,絕不姑息。

第一手消息請下載on.cc東網iPhone/iPad/Android/Windows Phone Apps