政情：四年任期 林卓廷投棄權票居首 郭榮鏗逾半表決缺席
開埋聽日最後一次大會，呢屆立法會就結束。喺過去四年立法會審議嘅法案同議案，根據一眾議員嘅投票紀錄，發現投棄權票最多嘅首四名議員都係民主黨（白鴿黨）議員，排榜首嘅係林卓廷，投棄權票共有一百二十次，而最多次喺投票時缺席嘅係公民黨（公文袋）法律界議員郭榮鏗。
「棄權榜」白鴿黨包攬前四
根據立法會嘅公開資料，截至上周嘅大會，總共進行九百三十六次表決，投棄權票五甲當中，榜首係林卓廷，其黨友許智峯（峯鴿）以一百一十二次排第二位、第三位係鄺俊宇佔九十七次，身兼黨主席嘅胡志偉則以九十六次排第四位，而第五位係熱血公民嘅鄭松泰。
之但係，四名白鴿黨議員嘅棄權票多數投喺議員修訂上，反而政府議案同動議，每人投嘅棄權票唔多於四十次。白鴿黨投棄權票嘅政府議案，包括《2018年撥款條例草案》二讀同三讀、食物及衞生局就《私營骨灰安置所條例草案》，喺全體委員會審議階段所提嘅第二組修正案，仲有委任張舉能做下屆終審法院首席法官嘅議案。
其實郭榮鏗喺主持內務委員會正副主席選舉期間不停拉布，令內會停擺逾半年，而佢亦係缺席投票最多嘅議員，總共有四百七十九次，即係喺過去四年逾半表決都冇現身。