政情：主持教材小組 開4次會未選到主席 梁耀忠被轟拉布失職
立法會研究幼稚園、中小學教科書及教材編製小組委員會自四月二十八日召開第一次會議，至今已經開咗四次會，但歷時兩個半月，拖到今屆立法會會期就完都未選到主席！主持會議嘅梁耀忠尋日仲宣布唔會再召開下次會議，多名建制派議員炮轟梁主持會議失職，故意拉布，阻住議員討論教材問題。但梁就話喺過去嘅會議入面，建制派議員發言人數比民主派議員仲要多，反駁拉布嘅其實係建制派議員。
小組委員會尋日召開第四次會議，多名建制派議員質疑梁主持會議嘅手法，倡議成立呢個小組委員會嘅議員容海恩，反問梁點解要喺會期最後一個星期召開會議，批評梁主持會議不當，又詢問有幾多個委員當時回覆可以出席會議，秘書處就話有九個。梁又解釋安排會議時，並未有其他會議撞期嘅情況。而喺梁回應容嗰陣，兩人係咁聲疊聲，梁更多次叫容收聲，又話如果容再發言就會請她離場。
無管理時間 差劣如郭榮鏗
身兼行政會議成員嘅議員葉劉淑儀批評，梁拉布嘅行為同早前主持內務委員會選舉主席嘅議員郭榮鏗一樣，直指梁有責任管理會議時間，而梁嘅失職亦要記錄在案。
另一名議員葛珮帆（EQ）都鬧梁擺明喺度拉布，叫梁「好心你啦，唔好扮晒嘢！」又指摘民主派冇勇氣討論教材編製，話收到不少家長嘅投訴，指有部分教師扭曲歷史。EQ直斥民主派唔可以用卑鄙嘅方法阻止其他議員討論，又形容民主派係「霸權」，霸住個主持位唔畀大家選主席。EQ話普通市民都知道立法會開會好多時發言都要有限時啦，而選舉主席本身係十五分鐘就可以搞掂嘅事。
民主黨（白鴿黨）嘅議員許智峯（峯鴿）就認為選舉主席需要社會共識，小組委員會中建制同民主派議員嘅人數係一半一半，但有嚴重分歧。峯鴿又指控建制派議員都無心認真開會嘅，形容有啲建制派議員喺度開派對。
梁死撐程序上未曾作阻撓
面對建制派狂轟，梁澄清並無喺程序上阻止建制派議員選舉主席，建制派議員可以停止係咁發言，直接提出選主席，仲反指建制派議員嘅批評係無中生有。最後會議時間結束，梁仲專登「感謝」建制派議員拉布，令委員會選唔到主席。