中環出更：梁君彥改善立會形象失敗 反變議員出氣袋
今屆立法會會期即將結束，主席梁君彥接受電視訪問時話政治環境令議會關係難以改善，亦都未能幫立法會同中央政府建立溝通渠道，自己反而變成議員嘅出氣袋，只好喺辦公室聽吓歌減壓啦！
梁君彥上任前曾經好想改善立法會嘅形象，可惜呢個目標睇嚟做唔到喇！佢話特首林鄭月娥當選後出現過一個特別嘅蜜月期，政府對民主派注重嘅議題落咗好多工夫，而一啲民主派不滿嘅政府法案提交立法會後都會跌至谷底，佢形容主席就算點樣抱着良好意願去改善關係，最後都會喺大環境下消失。
梁君彥又感遺憾未能加強議員同中央官員嘅溝通，指民主派議員同北京或者中聯辦嘅溝通少之又少。
難忘去年七一立會遭暴力破壞
舊年七月一日，示威者佔領立法會，梁話相比議員因宣誓風波被取消資格同埋大規模修改議事規則更加難忘，形容示威者用極度恐怖嘅方式去破壞立法會。
被問及會唔會再參選，梁就話想休息吓，覺得呢四年做主席猶如坐過山車一樣驚濤駭浪，已經好足夠喇！不過，佢話參唔參選都要同屋企人同業界商量嘅，如果離開嘅話，最唔捨得就係一班秘書處嘅職員喇！
卓妮