中環出更：防疫做到足 陳黎惠蓮買埋空氣淨化機畀外傭
前排香港疫情有緩和迹象，以為可以鬆一口氣，點知近日又再大爆發，搞到人心惶惶。卓妮日前喺沙田馬場遇到保良局副主席陳黎惠蓮，問到依家疫情下感染人數日日都有雙位數增加，有冇影響心情，佢話一定有啦！
由於疫情擴散，市民又開始四圍撲防疫物品。問起有冇儲備多啲消毒物資？陳太話一向都有儲備，所以唔需要額外再買咁多。至於工人姐姐方面，佢都買埋空氣淨化機畀佢哋，等佢哋出外時安全啲，因為依家好多都係集體感染，叮囑佢哋多人嘅地方唔好去，如果佢哋選擇留喺屋企，就會補番人工畀佢哋。
陳太都話呢排都減少咗出街，平日冇咁多人會去郊區行吓，仲可以趁呢段時間了解吓香港歷史。咁有冇諗住疫情好轉去吓旅行？佢話暫時唔諗住，要確定安全先再算，費事買咗機票要取消就麻煩。
聖誕想去東南亞 葉嘉威望天打卦
轉頭見到博愛醫院總理葉嘉威、香港善德基金會主席董吳玲玲同香港教育工作者聯會會長黃均瑜。葉嘉威話自己做IT工作，原本諗住遲啲可以上去深圳開會，但依家唔使諗啦，諗住聖誕節如果可以嘅話，會去東南亞開會順便行吓，依家惟有乖乖哋繼續等，佢仲話呢段時間冇嘢做都會留喺屋企，或者約家人同朋友喺屋企食飯，打吓麻雀咁。
香港善德基金會副主席鄭穩偉亦話早前見到香港好多日零確診個案，諗住應該會好快回復正常，殊不知確診個案又再上升，幸好佢嘅生意可以喺電腦上處理影響唔係咁大。佢仲話原本打算冬季會去旅行，依家真係要睇定啲再諗。
卓妮