政情：攬炒派拉布玩殘內會 象哥斥污衊建制蒙騙市民
延長法定產假至十四周嘅《二○一九年僱傭（修訂）條例草案》至今仲卡住喺二讀階段，尋日議案繼續審議時，建制同泛民更爆發罵戰。議員梁耀忠話草案繞過內務委員會，交付人力事務委員會審議後轉交大會，違反立法程序。多位建制派議員即刻反駁話，民主派議員拉布先導致內會停擺，大鬧泛民污衊建制派、蒙騙香港市民。
梁耀忠話建制派同政府赤裸裸無視立法會程序，搞到立法會變成「無掩雞籠」。佢又話民主派並唔反對草案內容，只不過係反對立法方式喎。但梁嘅言論隨即遭到強烈「反彈」。
「內乜嘢會 主席都冇」
議員陸頌雄話內會遲遲未能選出主席，反對派竟然話交畀人力委員會審議唔符合規矩，指斥梁耀忠作為勞工代表，賊喊捉賊、出賣工人利益。
議員黃定光（象哥）就鬧爆攬炒派將內會「玩殘」後，竟然掉轉頭話草案繞過內會，反問「內乜嘢會，主席都冇！」形容選主席嘅過程「難過到西天取經」。佢又怒斥反對派污衊建制派議員，叫泛民應該拎塊鏡照吓自己，大鬧泛民嘅理論十分可恥，希望反對派停止蒙騙市民，盡快令草案得以通過咁話喎。