今屆立法會將會喺下周結束，立法會財務委員會仲有一大堆積壓議程未審議，包括備受爭議嘅明日大嶼計劃中嘅交椅洲中部水域人工島研究、造價高達十七億元嘅元朗天橋工程等等。嚟緊財委會喺下周一和二加開會議，據當日嘅議程，有爭議性嘅工程撥款統統冇影，睇嚟依堆工程撥款應該趕唔切尾班車喇！
財委會議程積壓多時，其中有五十幾項係同工務工程有關，包括明日大嶼計劃中嘅交椅洲中部水域人工島相關研究，相關項目都要五億五千萬元。翻查下周嘅財委會議程，十四項議程入面有十二項都係關於開設職位，剩番兩個分別係撥款五千五百萬元畀環保署設立空氣污染物立體監測網絡，同埋提高休漁期貸款計劃下嘅最高貸款額，換言之受爭議嘅工程項目全部都冇影。
根據過往程序，如果財委會議案唔能夠喺會期完結前獲通過，喺新一屆立法會上就要從頭嚟過，要重新經由相關事務委員會，同埋工務小組審議，先可以再喺財委會上申請撥款。今屆立法會就嚟完結，今個星期嘅財委會仲有成廿幾個項目要審議，政府眼見咁嘅情況，相信都會放棄受爭議性嘅項目，留番下屆再上立法會喇。