政情：裝條電線當充電設備 發展商偷雞 議員狠批

地契寫明要有插頭

立法會環境事務委員會轄下一個電動車發展的小組委員會尋日開會，有議員批評政策推行已九年，有發展商「偷雞」只裝條電線就當係充電基礎設施，蒙混過關，要求當局檢討相關政策，兼且喺地契上寫清楚，至少要有埋充電插頭先叫基礎設施。

環境局副局長謝展寰回應話現時有八成新建私人樓宇享有寬免總樓面面積。佢解釋，因為唔同電動車使用唔同嘅充電器，難以統一要求安裝一樣嘅插頭。

另外，電動車「一換一」稅務優惠明年三月三十一日結束，議員盧偉國認為相關優惠能為車主提供誘因，以電動車取代汽車。另一議員易志明亦希望政府盡早公布會延續稅務優惠，有利電動車供應商評估未來發展，或及早入貨，又建議當局將稅務優惠嘅金額提升至十五萬元，增加更換電動車的誘因。而環境局稱推動電動車政策不變，適時會公布。