政情：修例風波解說政策落後 陳克勤：港府停留石器時代
今屆政府上場三年以來，曾推出多項引起軒然大波嘅政策，要數最嚴重嘅一次當然係自去年起、因政府建議修訂《逃犯條例》所爆發嘅反修例風波，其後續嘅政治糾紛至今仍餘波不斷，嚴重影響本港嘅經濟同社會安寧。議員陳克勤就將問題嘅原因，歸咎喺政府解說政策嘅方法落後，就好似停留喺「石器時代」咁，敦促當局應檢討點樣同現今嘅網絡世界接軌！
難應對社交媒體嘅訊息演變
陳克勤尋日喺Facebook上載一段短片，形容政府過去向公眾解說政策時，儼如停留喺石器時代嘅原始人，仲係用緊石頭嚟做工具，反問政府用呢啲咁落後嘅方法，點樣應對社會喺Instagram同Telegram等社交媒體上嘅訊息演變呢？
佢又提到，雖然親建制嘅政黨都會協助政府喺網上宣傳同傳遞訊息，但就認為解說政策嘅責任主要落喺政府身上。佢仲話，若果政府作為負責推動政策嘅人，都唔能夠將訊息清楚咁話畀市民聽嘅話，就證明呢個政府喺推動政策方面係何等失敗！