政情：擔心民政處口罩有問題 元朗區會擬追問來源
疫情爆發之初，全城都掀起口罩荒，全港十八區嘅區議會都因應當時需要，通過撥款搜購口罩，其中元朗區議會就撥款一百萬元。根據元朗區議會最新嘅文件，民政處經已採購咗大約十七萬個口罩，花費接近五十萬元。不過早前政府物流服務署採購咗啲疑違反《商品說明條例》嘅口罩，唔知元朗區議會呢批又有冇份呢？有區議員都擔心口罩來源，計劃會喺區議會上追問。
撥款剩番50萬 將商議點處理
根據元朗區議會嘅文件，今次民政處採購嘅口罩，約有十萬個係成人口罩，每個成本約兩個半左右；另外仲有約七萬一千個小童口罩，每個成本約三個半左右。民政處會根據撥款守則，將口罩分派畀精神病康復者、懷疑有精神健康問題人士同埋其照顧者、殘疾人士及其照顧者、獨居長者、少數族裔同埋新來港人士等等。
元朗區議員麥業成回應查詢時指，初步接受民政處嘅安排，不過都會擔心口罩嘅來源，打算喺今日嘅會議上追問口罩來源。至於本身區議會撥款剩番嘅五十萬元，麥業成就話喺會上都會再追問，睇吓剩番啲錢會點處理。