政情：疫下停搞蛇宴 培訓班 勞聯獲300萬補貼吊命
首批領取出糧補貼嘅僱主名單尋日出爐喇，唔少工會都有申請，好似港九勞工社團聯會（勞聯）就獲批逾三百萬元，有一百六十三名打工仔嘅飯碗尚算無恙，勞聯嘅勞工界議員潘兆平解釋，佢哋嘅兩大主要收入嚟自培訓課程同舉辦蛇宴，但受疫情影響兩項活動都要取消，令收入大受影響，所以要申請計劃吊命呀！
陳健波兩公司亦申請
申請保就業計劃嘅都包括咗香港中華廠商聯合會（廠商會）、香港教育工作者聯會、同埋安老事務協會等。廠商會就攞到二百三十萬元資助，而其屬下有關展覽服務嘅公司亦獲批七十七萬元補貼，牽涉一百一十八名打工仔飯碗，廠商會會長吳宏斌話受中美貿易摩擦、反修例示威同疫情等因素影響，廠商會由舊年開始出現財政赤字，都有諗過精簡人手，但政府及時推出「保就業計劃」，叫做幫輕吓負擔。
就連身兼立法會財務委員會主席嘅保險界議員陳健波都有申請，佢做行政總裁同執行董事嘅兩間保險公司，受薪僱員人數共一百一十人，並分別攞到一百一十六萬元同一百六十八萬元資助。