政情：增產假博懵變增侍產假 楊岳橋全數修訂遭D Q
立法會聽日召開大會，其中有關法定產假由十星期增至十四星期嘅《二○一九年僱傭（修訂）條例草案》（條例草案）將恢復二讀辯論。議員就此合共提出十四項修正案，不過公民黨（公文袋）議員楊岳橋（AY）就意圖「博懵」，提出十項關於「附加侍產假」嘅修正案喎。主席梁君彥直指AY提出嘅修正案顯然偏離條例草案嘅主題，全數拒批（DQ）喇！
梁君彥批偏離條例主題
唔單止拒批AY提出修正案，議員鄭泳舜都以人力事務委員會主席嘅身份，代表委員會就草案提出三項修正案，內容涉及修訂款額上限，同埋關乎上限嘅定期檢討，而梁君彥淨係批出一項，話另外兩項涉及額外公帑開支，最後就冇批到啦。議員郭家麒提出嘅一項修正案就涉及提早條例嘅生效日期，梁認為會招致龐大嘅額外公帑開支，裁決該項修正案需取得特首嘅書面同意方可動議，但最後都冇批出。
AY提出嘅修正案係旨在畀懷孕僱員有權選擇將「附加產假」轉為「附加侍產假」，即係如果BB嘅媽媽唔放假就可以考慮轉畀爸爸放。梁君彥就話AY提出嘅修正案顯然偏離條例草案嘅主題，同時違反《議事規則》而拒批。
疑拉布拖延譴責毛孟靜
根據立法會文件，今次修訂嘅條例草案旨在將法定產假延長四星期、就延長產假需要支付嘅薪酬設立上限等情況作修訂。其實文件就寫得好清楚，但唔知AY點解會提出將「附加產假」轉為「附加侍產假」喎。究竟佢係咪想「博懵」？其實，之後動議譴責議員毛孟靜嘅議案就「排緊隊」，莫非佢又想「積極提出及討論修正案」而拖延時間？
另外，政府向立法會財務委員會申請逾一億六千五百萬元嘅追加撥款，同埋由下年度起嘅五億二千四百萬元嘅每年經常撥款，用作支付發還產假薪酬所需嘅款項，同埋委聘代辦機構嘅服務費。而政府早前就草案提出修訂，新增四個禮拜嘅產假薪酬補貼上限，由三萬六千元提高至八萬元，實質相當於月入十萬港元嘅僱員喺四個星期內可取得嘅產假薪酬。