中環出更：半年冇去 黃家和恨返法國莊園歎酒
夏天本來係旅遊旺季，但受到疫情影響，好多國家都封城，搞到大家都冇得搭飛機去旅行。留咗喺香港差唔多半年，疫後最想去邊玩？香港餐飲聯業協會會長黃家和最想去佢喺法國嘅莊園摘提子同歎酒。
黃家和喺法國有兩個酒莊，每年都會去幾次巡視業務。因為疫情半年冇去，好在當地一直有向佢報告情況，法國政府都會向酒莊收購因為疫情賣唔出嘅酒，而今年提子嘅收成量同質量都唔錯啊，唔知係咪同全球工廠停工又或者冇咗遊客，少咗人騷擾，空氣又好咗有關呢？
十月開始就係提子嘅收成期，黃家和每年都會搞團帶埋成班老友一齊去摘提子。可能因為大家都太耐冇出門，今年嘅反應特別雀躍，依家已經有廿幾人話想去，唔知去到十月有無機會開番關成團去法國喇！
容永祺同太太想去泰國玩
香港專業及資深行政人員協會創會會長容永祺話留咗喺屋企咁耐，最近佢同太太就好想去泰國玩，就算只係三四日都得。去到乜嘢都唔使做，簡簡單單對住陽光與海灘休息吓已經好開心。不過，長遠嘅話，佢都係想去歐洲，事關佢一家人本來計劃咗今年四月去北歐旅行，畀疫情搞到無得去，點都要之後補番去嘅！講起歐洲，佢話都好掛住英國，佢好鍾意喺英國食個英式早餐，再慢慢歎番杯咖啡，享受慢活。
唔單止容永祺想去英國，香港中華廠商聯合會副會長吳清煥都話最想去英國，但就唔係為咗玩，係因為嗰邊有物業。吳清煥嘅囝囝喺英國讀書，廿四孝老竇上年就喺倫敦買咗物業，諗住畀囝囝讀書同畢業後做嘢嗰陣住，吳清煥喺年初仲飛埋過去收樓同等傢俬添，點知疫情爆發，佢惟有焗住傢俬都唔收住即刻飛返香港。佢話就算物業跌市都無所謂啦，反正都係自住啫，依家佢淨係希望疫情快啲受控，就可以飛去英國繼續搞好間屋，等囝囝有得住。
卓妮