中環出更：商家疫境自救 吳宏斌：要睇準時機快人一步
新冠肺炎疫情令到已呈疲態嘅香港經濟雪上加霜。香港中華廠商聯合會（廠商會）會長吳宏斌，指各地封關阻絕疫情傳播，令到好多企業都接唔夠訂單，做老闆要苦惱於出糧同承擔營運開支，唔夠工開嘅打工仔就擔心收入不足以應付供樓，甚至連自己嘅使費都只係「掹掹緊」！儘管市況確係苦不堪言，不過辦法總比困難多，佢相信一定可以搵到應對嘅策略。
吳宏斌日前喺廠商會一個活動上，指唔少商家處理業務都面對好大困擾，心情頗為焦慮，依家主要忙於商討下半年嘅對策，咁有啲咩方法可以喺「疫」境下自救？吳宏斌認為要睇準時機，例如疫情影響下，防疫用品嘅需求大增，有唔少廠商索性轉為經營銷售清潔用品，但佢話就算做得好，都會好快有人「跟風」，認為如果要優勝過其他人，必須先人一步，拎到產品嘅專利權嘅話就更加好。
史立德籲廠商部分出口轉內銷
從事印刷及包裝生意嘅廠商會第一副會長史立德（Allen）話，疫情爆發後生意下挫四成，與舊年同期相比就跌咗一半。由於佢經營嘅業務並非上游行業，營業額好視乎外銷市場嘅好壞，只要出口貨量少咗，佢公司有部分生產線都要停產，Allen解釋歐美仲未開番關口，就算訂單做咗都去唔到貨。佢覺得廠商要將部分出口業務轉為內銷，先可以減輕經營壓力，又相信疫情過後，中國市場會起飛得快啲，希望生意到時會好轉。
有「家電大王」之稱、廠商會副會長陳國民就話自己盤生意，並無受疫情太大影響，近來喺空氣清新機、家用煮食用具嘅銷量都錄得上升，但礙於近排無咩新餐廳開張，所以商用廚具就幾乎無人問津咁滯。
受疫情影響，香港貿易發展局研究總監關家明預料，香港今年全年出口量將會下跌一成，佢話數量上係十年嚟最差。雖然有公司轉型做防疫用品出口貿易，但據佢所知並唔多，亦都要花一段時間觀察轉型係咪成功。
卓妮