政情：誤傳派1萬 陳克勤：美麗誤會
喺社交媒體上打錯字好容易造成誤會，如果令人誤會有錢派，算唔算係最美麗嘅錯誤呢？粉嶺社區幹事林智洋前日同議員陳克勤一齊喺粉嶺派發政府一萬蚊申請資訊同埋防疫口罩，仲喺社交網站上公布資訊，點知個貼文就寫成派一萬蚊，搞到陳克勤要再發文解畫。
解釋貼文排版出錯
陳克勤尋日就喺Facebook上同大家講番聲對唔住，解釋番呢一切都係誤會。佢解釋話，林智洋本身係想打「陳克勤議員今早到粉嶺派發一萬元申請資訊及防疫口罩。」點知Facebook排版出現問題，刪除咗句子嘅後半部分，令句子變成「陳克勤議員今早到粉嶺派發一萬元」。
陳克勤形容Facebook為大家帶嚟美麗嘅誤會，重申自己係去派一萬蚊嘅申請資料單張，仲講笑話多謝林智洋抬舉添！至於當事人林智洋睇嚟唔知道排版出現問題，事關佢仲留言話「吓，我本身以為搞笑。即係其他人睇唔到個post後面d字？」不過都有網民心水清，叫陳唔好介意，指正常人都明白冇可能由陳克勤派一萬蚊。