政情：轉任副局長 何啟明靠黨元老執手尾
上月底辭去勞工界議席、出任勞工及福利局副局長半個月嘅何啟明，喺工聯會剩低嘅工作，話咁快就有人接手跟進，幫佢「執手尾」嘅仲要係議員黃國健（KK）同該會榮譽會長陳婉嫻（嫻姐）兩位「老將」。KK負責收留何啟明嘅員工，而嫻姐就幫手管理工會今年二月中開始營運嘅口罩工場，真係勞師動眾，睇怕何啟明真係無以為報。
還番員工畀黃國健
何啟明上任勞福局副局長之後，一直未有交代佢喺工聯會剩低嘅工作由邊個接手，佢尋日接受查詢時話，其辦事處職員，包括助理等，都會去幫KK手，又話其實本來啲職員都係問KK借嘅，所以畀返KK都好合理。嘩，原來工記啲職員可以借四年咁耐，人手認真靈活調配。
至於口罩工場，何之前係「廠長」，經常出入大埔工業邨工場，但何話並非佢一個人搞晒嘅，因為工會其他成員亦有份落手落腳打理，其中嫻姐一直都有幫手，例如一齊物色工場嘅選址，而最重要係口罩工場目前已經上咗軌道，相信交由嫻姐主力管理都應該唔成問題喎。不過，嫻姐年紀都有番咁上下，要佢老人家頻頻撲撲、山長水遠入大埔，都咪話唔辛苦。