中環出更：美國揚言制裁 陳家偉：對港短期影響有限

陳家偉又認為香港遭捲入中美角力當中，雖屬不幸，但由於美國同香港嘅商業往來，遠遠唔及得中港之間咁密切，加上龐大嘅國際市場份額，目前只得美國離場，未必可以動搖到香港作為國際金融中心嘅地位。至於近日傳出拋棄港幣改持美元嘅主張，佢覺得此舉未免過慮，因為聯匯之下嘅港幣就係美元嘅代用券。佢又話內地具有十分雄厚嘅經濟同消費潛力，人民幣嘅前景只會愈來愈國際化。至於評估中美一較高下嘅結果，佢相信中國勝算較高。

嚴玉麟蘇陳偉香冇有怕

香港電子業商會榮譽副會長嚴玉麟就話自己一啲都唔擔心，佢解釋政治人同生意人係兩類人，前者為眼前選票，後者講長遠利益，佢話美國政府就算出錢鼓勵美資公司撤出中國，但顧及生產成本同中國市場，相信好少公司會響應。嚴玉麟又話對香港投資市場有信心，認為近日多咗人拋售物業，但主要係一啲公司因飽受社會同疫情衝擊而作出套現周轉，其實留意吓樓市冇大變動同息口依然偏低就知道。

嚴玉麟（左）指美資公司未必願意將生產基地撤出中國。旁係嚴嘅兒子嚴子諭。

蘇陳偉香（右）同女兒潘蘇凱欣（左），都對香港樓市有信心。

仁濟醫院前主席蘇陳偉香就話，就算真係取消獨立關稅區優惠，對佢生意都冇大影響，因自己喺內地設廠，已經受美國高關稅影響，至於樓市方面。蘇太話香港人今時唔同往日，經歷過沙士同金融海嘯，由過往持投機心態，進展至經驗豐富嘅投資活動，目前購買物業嘅人都已經預先計算咗承受風險嘅能力，所以相信樓市都唔會出現大波動。

卓妮