中環出更：禁電子煙審議中止 邵家輝呻嘥時間
《2019年吸煙（公眾衞生）（修訂）條例草案》委員會尋日召開最後一次會議，主席郭偉強喺諮詢過委員嘅意見後，隨即宣布審議工作停止。會議上委員提出各種意見，仲互相指罵。有議員突然話要加會審議；亦有議員話不如直接宣布中止討論，反正都冇可能完成審議工作。
會議上發言最火爆嘅就係邵家輝，佢發言期間話郭先前表示需要加十次會，大部分委員當時表示唔同意，但依家又有委員要加會審議，邵就話「真係畀你哋吹脹，依家我唔使做嘢呀？」仲話各委員唔好一邊話加會，到時候又唔嚟開會呀！
黃定光質疑委員平日唔嚟開會
議員黃定光話過去每次開會都係得郭偉強、邵家輝同自己討論，形容係「三人行」，但今日突然好多委員出席會議，質疑其他委員嚟「趁墟」。黃更催促郭快啲決定係咪繼續審議，仲話「唔好驚孭飛先得o架！」
而郭最後覺得冇可能完成審議工作，諮詢委員意見及投票後，決定中止法案審議工作，但就容許其他在席議員向政府作簡單查詢。邵就鬧爆政府誤導市民，從來冇聽過有人支持電子煙，建議立即禁止電子煙、規管加熱煙。郭隨即提醒話審議工作已完結，發言要簡短。邵就話「簡短而言，咪憤怒囉！」邵大呻委員會浪費佢一年幾時間，仲反問「審議工作完結，咁我喺度做乜？」
卓妮