政情：憂被追問沙中線醜聞 歐陽伯權疑驚到聲沙

歐陽伯權喺主持股東大會前會見傳媒，短短十五分鐘期間已經清咗三、四次喉嚨，有時講講吓又要清一清喉嚨。近幾個月新冠肺炎疫情肆虐，一聽到有人唔舒服就自然會人心惶惶，佢又沙聲又清喉嚨，係唔係中招呀？嚇親人喎。佢就自爆叫大家唔使擔心，聲稱已經做咗新冠肺炎檢測，仲話冇事喎。

之不過，沙中線工程咁多醜聞，都好難冇人追問喇，會上就有小股東追問，有關工程項目延期嘅問題。歐陽伯權回應時就承認港鐵有不足之處，仲話會從中學習添，又話已經改良咗多方面嘅工程措施。

另外，舊年因應社會事件，唔少港鐵車站設施都被破壞，有股東亦有追問會唔會向涉事人士追討賠償，但佢就冇正面回應喇，只係話所有違法行為會報警處理，同埋尊重法庭裁決喎。