政情：謝偉俊親生細佬照出賣

講真o架！阿Paul真係出賣細佬……張相。話說佢日前拎番啲舊相出嚟睇，揀嚟揀去，終於揀咗「出賣」親生細佬，將一張兩人嘅童年黑白合照擺上社交平台，叫網友估吓相入面兩個小朋友邊個係佢？睇過張相，兩兄弟年齡差距唔夠一年又真係好難估嘅，最後阿Paul就開估話右手邊嘅小朋友就係佢細佬Joseph喇，Joseph一家已經喺美國生活咗好耐。而嗰張相係佢哋細個住喺蘇屋邨八一七號單位出面影嘅，非常有紀念價值！阿Paul仲講笑靚仔啲嗰個就係自己喇！

唔少網友都估錯，以為右邊高啲嗰個係阿Paul，因為哥哥應該高啲，其實左邊矮啲嘅先係佢，但亦有網友醒目地留意到阿Paul專登提到細佬細佢唔夠一年，所以高度唔可以作準，網友仲話呢啲舊相係珍藏品嚟（口架）！

唔單止兩兄弟嘅合照，阿Paul仲拎咗張「全家福」出嚟，係細個嗰時去公園影嘅相，佢形容當年啲人出街，衣着好講究，佢爸爸着西裝打埋呔，媽媽亦着長衫同揸手袋。