政情：八網難逃：打高球都唔鬆懈 陳家強孫德基保持距離

開估喇！咪就係財經事務及庫務局前局長陳家強（KC）同審計署前署長孫德基（David）囉！話說陳家強日前喺Facebook上載咗張相，係佢同朋友一齊喺愉景灣高爾夫球會打高球，揸住支高球棍都唔敢並排企，而係企開啲，中間分隔一啲距離，KC仲貼文話，打高球都要保持社交距離。

幾個波友都冇戴口罩

幾個波友都冇戴口罩，而其中一個就係David嘞！見佢仲笑到見牙唔見眼添！話時話，David做咗六年半審計署署長，喺一八年年底退休後，好少喺公眾場合現身，仲記得佢當時講過，話一早已諗好，去到退休年齡就退休，仲話已計劃咗好幾年，而退休後會去旅行一段時間，之後睇吓有乜機會服務社會，但唔想做全職喎。