政情：臨近屆尾 議員等「收工」兩次大會質詢唔夠數
立法會呢兩個禮拜嘅大會都係審議新一份預算案，所以冇咗口頭質詢，只有書面質詢，總共十六條，但上周三嘅會議只安排咗十四條、今日嘅會議就只得十三條，連續兩次大會都唔夠數，情況都好罕見，唔通班議員偷懶？
根據今日大會嘅議程，只係編定咗十三項書面質詢，而唔係十六項，因為係作出質詢預告期限屆滿時有三個名額冇議員申請。平日班議員爭崩頭咁入口頭質詢同書面質詢，依家竟然班議員放棄書面質詢名額，好反常喎。
內會交戰 搞到精疲力盡
自由黨嘅議員鍾國斌就話自己都有兩條問題想問，但之前就因為政府WFH（在家工作），部門都幾乎停頓，就費事問問題啦，同埋早前財政預算案每個議員都問咗唔少，仲話最重要係因為臨近屆尾，又講明唔係懶，係有其他嘢要處理啫！勞工界議員何啟明就話因為疫情關係，少咗同業界見面傾問題，加上最近都忙緊抗疫基金、「保就業」等新政策措施，暫時放下現有嘅政策，之後會多番啲見面。
廿三萬監察發言人、前議員王國興都話呢個情況唔多見，大多出現喺屆尾，班議員無心戀戰，無認真行使監督政府嘅責任。另外，就係因為近日建制派同泛民主派喺內會交戰，搞到雙方精疲力盡，大家無心關注其他政策問題，未來就會出現好多細節上嘅甩漏，問題積埋、積埋得唔到解決。