政情：海洋公園承載集體回憶 沈豪傑籲救亡
海洋公園要求注資救亡，惹起社會唔少議論。元朗區議員沈豪傑日前喺社交網站發文，就以結業多時嘅荔園嚟比喻，指「有些東西，沒了便是沒了。擁有的時候不珍惜，到失去的時候悔恨已經太遲。」認為海洋公園係值得保留咁話。
港保育教育一部分
不過沈豪傑都明白，要海洋公園繼續經營落去，就要由庫房泵水，不過佢話海洋公園並非一個普通嘅遊樂場或遊客設施，且還是一個香港地標，亦係香港保育教育嘅一部分，承載着香港人嘅集體回憶。若果一旦結業，除咗員工失業，園內嘅動物，包括海豚海獅、熊貓等等，又點處置呢？佢又話海洋公園消失咗，小朋友可以睇動物嘅地方又少一個。
佢又話有聲音指，海洋公園嘅土地應改為起屋，但如果連海洋公園都容不下，咁一個有歷史價值嘅地方都可以用不符效益為由，拆掉起屋，香港將會成為一個點樣嘅城市？我們嘅歷史同文化都唔珍惜，香港是否窮得只剩下起屋一個目標？