政情：口罩荒暫告段落 徐汶緯信低谷已過
繼兩個月前以抽籤形式派口罩，稻苗學會日前再度向飲食業同行派發口罩，不過今次就係透過七個餐飲工會同埋郵寄，將口罩分發出去。主席徐汶緯話今次捐出嘅五萬個口罩，搜購方面遠遠唔及得早前咁艱難。雖然全港市民都將獲分發一個銅芯口罩，香港嘅口罩荒可以話告一段落，但學會仍決定向會員及同業派口罩，以便銅芯口罩清洗時，業界仍有口罩可用。
母親節喜見飲食業復甦
徐汶緯又話隨住口罩供應日漸充裕，本地疫情亦趨向緩和，飲食業所受嘅限制亦得以放寬。佢話「禁聚令」初期，為符合待客座位唔可以過半嘅規定，好多食肆實際上只能接待三至四成客人，不過當人數上限放寬為八人之後，食肆嘅入座率明顯提高，母親節嘅生意額總算係有所改善。
若情況繼續平穩發展的話，佢認為飲食業應該可以擺脫最壞嘅時刻，但前提當然係市民都要保持自律，佢話稻苗學會都唔希望見到有第三次派口罩咁話。