政情：葉劉又蝦碌 幫薛永恒改名
過去曾經多次嗌錯其他人名嘅議員葉劉淑儀再次蝦碌，今次「幸運兒」係新上任創新及科技局局長嘅薛永恒。葉劉尋日喺Facebook貼文，重提自己前日喺立法會資訊科技及廣播事務委員會會議上嘅發言，仲喺貼文上指自己喺會上特意詢問「薛正恆」有關應用大數據嘅問題添！
嗌錯人名 早有前科
本身係機電工程署署長嘅薛永恒喺上月廿二日先升任創科局局長，外界隨即質疑佢喺市民同業界嘅知名度都好低，冇乜人識，所以薛一上任就話要認識更多新朋友。之但係，其實薛同葉劉都係行政會議成員，理應有唔少機會碰頭，但係葉劉仍然記錯薛嘅全名，唔知道係咪因為薛冇積極咁遞卡片畀葉劉呢？
查實葉劉嗌錯人名係早有前科，例如佢喺二○一八年主持人事編制小組委員會會議嘅時候，就試過叫錯副主席周浩鼎做佢嘅黨友鄭泳舜，引嚟會上一陣大笑，搞到葉劉都要「耍冧」，仲話「兩個都咁靚仔」。
葉劉喺同年亦試過將議員許智峯叫錯咗做「許智威」，而喺二○一七年亦試過喺開會期間，嗌唔出另一位議員郭榮鏗嘅中文全名添！