政情：梁美芬轟港台節目偏激 梁家榮監管不力

近年以嚟，港台節目備受抨擊，警務處處長鄧炳強早前兩度去信梁家榮，指《頭條新聞》中名為「驚方訊息」的環節抹黑警隊，是顛倒是非，要求梁跟進；港台節目《The Pulse》早前訪問世界衞生組織官員時，竟然詢問世衞會否讓台灣加入，被批評是配合台獨分子「以疫謀獨」的圖謀。

商務及經濟發展局亦指有關訪問表達違反一個中國原則，而通訊事務管理局早前接獲大批市民投訴，指港台喺舊年十一月二十日播出嘅《左右紅藍綠》電視節目內容偏頗失實。

後生仔冇免疫力易受影響

梁美芬尋日喺會上直指港台節目備受爭議，成日被市民批評內容偏頗。佢話雖然香港有新聞自由，但部分港台節目內容偏激，十幾歲嘅後生仔思想未有「免疫力」，容易受到節目影響，應該重新審視節目內容。

佢話有啲港台節目內容偏激，甚至有節目讓年輕人分享為何變成暴徒，但聽唔到平衡意見，認為如果港台屬於香港人嘅電台，就要反映香港人真正嘅聲音。又話議員未有提及同港台相關嘅修正案，強調港台用得公帑就需要受到監督，促請梁家榮要細聽港台唔同嘅節目，以防節目偏頗，亦要對節目立場多加注意，期望港台播放政治節目時注意持平雙方意見喇。

鬧爆反對派想毀滅香港

唔單止鬧港台，梁美芬亦鬧爆泛民主派議員早前已變成「乜嘢都反對」嘅反對派，依家仲演變成攬炒派，想攬炒香港！佢仲點名話公民黨（公文袋）議員楊岳橋「好醒目」，唔知係唔係近排發覺香港市民唔想攬炒，就意圖將攬炒嘅責任推畀政府。梁話無論泛民主派議員政見如何、對政府有乜嘢不滿，都應該共同反對暴力同本土恐怖主義，強調雖然政府好多嘢做得唔夠好，但都唔應該成為泛民毀滅香港嘅藉口囉！

呢頭批評完泛民議員，但梁美芬都冇諗住放過政府喎。佢話政府遲遲未推出每月九千港元、上限半年嘅失業援助金，大鬧政府明顯就係做得唔好啦！睇怕政府都要反省吓啦！