政情：譚文豪催審垃圾徵費 反被嘲黨友內會拉布
立法會內務委員會拖拉逾半年仍未選出正、副主席，影響多條法案的審議。立法會審議垃圾徵費嘅條例草案委員會尋日開會，公民黨（公文袋）嘅議員譚文豪聲稱草案已進行十多次會議，但仍未進入逐條審議的程序，希望加快審議，隨即被建制派議員反嘲，叫譚不如轉告負責內會主席選舉程序嘅黨友郭榮鏗「唔好Dum會」，內會出現大塞車，侍產假、賓館條例等多條草案被拖延，反建議請郭到委員會交代幾時可將讓垃圾徵費草案交上內會。
議員郭偉强批評「攬炒派」要求加快審議垃圾徵費草案，只為擾亂公眾視線，話畀支持者知，佢哋好緊張議會運作，但實際上香港愈亂，「攬炒派」就愈開心。另一議員何俊賢則暗諷內會議員發言時可以好有技巧，可將複雜嘅問題簡單化，既然內會現時空轉「塞車」，草案交內會亦未能處理，故討論垃圾徵費時，委員可以慢慢逐條審議。
「唔想另一啲『病毒』嚟呢度」
另一議員鄭泳舜亦不滿內會停擺影響廢物處理的部分，批評郭榮鏗不斷拖拉，要請郭出席垃圾徵費嘅審議會議，當面問郭「幾時容許條例可以上內會」，又要求譚文豪向郭轉達「唔好Dum會」，佢哋希望垃圾徵費條例可以加快通過，絕對唔介意加開會議，又狠批郭不斷拖拉令唔少條例草案胎死腹中。
不過，委員會主席馬逢國則指要求郭唔好拖拉選主席，並唔係呢個委員會嘅權力範圍內，佢只知郭嘅唯一使命係選出內會主席。對於邀請郭出席會議，馬逢國就話：「唔想另一會議的『病毒』，走到嚟呢度」。