中環出更：囡囡打孖畢業 張太雙喜臨門
嘉頓新抱張王幼倫（Michelle）日前出席一個畫展開幕典禮時，透露嚟緊復活節假期會去英國逗留兩星期，主要目的係探吓幾個寶貝仔女。Michelle甜絲絲話，一對愛女張詩賢同張詠賢，喺當地修讀經濟同地理，今年六月將會齊齊着畢業袍，真係雙喜臨門。
Michelle身為珠寶設計師，每次出席公開活動，都打扮得明艷照人，當日佢就着住Anne Klein連身裙，將窈窕身段表露無遺，配上DIY耳環，氣質獨特。Michelle話，兩個愛女每年都會趁放假返港，但今年因為要考畢業試，佢唔想愛女心散，所以決定親自飛去英國探佢哋，包括喺當地做緊見習律師嘅大仔，仲順道朝拜倫敦藝術館添。
買油畫送囝囝
當日Michelle喺畫展購入一幅名為「Boxer」嘅油畫，佢大讚幅畫顏色鮮艷，好有動感，原來幅畫係打算寄去英國畀大仔，等囝囝見畫如見人喎，呢個媽咪真係有心思。