政情：港台節目 投訴爆燈 梁家榮被促道歉辭職

警務處處長鄧炳強早前兩度去信廣播處處長，投訴《頭條新聞》涉抹黑警隊；至於《The Pulse》就喺訪問世界衞生組織官員時，問對方會唔會畀台灣加入世衞，之後港府批評做法係有違「一個中國」原則。

今年首3月投訴 超去年總和

睇番通訊局嘅投訴數據，港台嘅五個電視時政節目，包括《頭條新聞》、《視點31》、《城市論壇》、《鏗鏘集》同《議事論事》，上年收到三千五百四十八宗投訴，當中有三千五百三十一宗係同上年六月開始嘅反修例等社會事件有關。

喺五個節目當中，《鏗鏘集》就收最多投訴，高達一千三百四十六宗；其次就係《頭條新聞》，所收到嘅投訴就有七百七十六宗，其中有七百七十三宗係同反修例事件有關；《視點31》就收到三百八十四宗。依三千幾宗嘅投訴，主要係涉及資料不正確、不負責任言論、鼓吹違法行為、美化暴力及偏頗等等。

至於今年又點呢？喺頭三個月方面，依五個節目就合共收到四千一百零二宗，其中《頭條新聞》佔最多，一共有三千三百二十六宗，當中有超過三千二百宗係同喺二月十四日播出、即被指抹黑警隊嘅一集有關，而投訴內容大部分都係節目內容失實、偏頗、誤導、抹黑警隊同埋帶有仇警訊息。同時，《視點31》就收到一百九十五宗同反修例事件有關嘅投訴。

節目包庇縱容黑暴 視若無睹

眼見咁多投訴，「廿三萬監察」發言人、前議員王國興就認為投訴數字高企證明公眾眼睛係雪亮的，仲話上年反修例事件將香港搞得雞毛鴨血、流血不止，港台唔單止唔反對暴力行為，五個時政節目仲自稱以嬉笑怒罵形式嘲笑警方、鼓吹黑暴，完全係包庇縱容黑色暴亂。佢仲建議不如「執咗佢」以免浪費公帑。佢批評梁家榮對事件完全置之不理、視若無睹，早前面對政府嘅指摘，亦完全不作交代，促請佢應向公眾道歉，甚至問責辭職。