政情：派漂白水 葛珮帆一身賣魚裝
新冠肺炎肆虐，好多防疫用品都賣到斷晒市，除咗口罩之外，漂白水都係市民必須嘅防疫用品。議員葛珮帆（EQ）早前落區，以「賣魚look」打扮向街坊免費派發漂白水，希望「做到幾多得幾多」，助解大家燃眉之急。EQ又呼籲大家若有剩餘物資，可以捐出。
EQ喺社交平台上載短片同相片，先多謝有心人同團體捐贈一批口罩同漂白水畀佢，EQ收到後就即刻將物資運到全港各區，分發畀有需要嘅市民，而且佢仲親力親為，着好圍裙同戴埋手套，成身「賣魚look」，聯同黨友到沙田派發漂白水同防疫用品畀街坊。
整污糟心愛長褲
不過，EQ呢一身裝束唔係一開始就咁齊備，佢話本來淨係戴手套，後來有街坊提醒佢先慢慢加埋眼罩。有一次派漂白水嗰陣佢發現條長褲畀濺出嘅漂白水整到甩色，佢仲話好鍾意條褲o架！但無奈整污糟咗，往後惟有每次都着呢條褲去派口罩囉！