政情：立會打到爛蓉蓉 葉建源議程失埋蹤

教育界議員葉建源尋日就喺社交平台發文話，「理順小學管理人手及薪酬架構」嘅議程，原本上年排喺頭幾項，但無故被撇除喺議程之外，冇晒蹤影。佢已去信政務司司長張建宗，要求擺番入財委會議程同埋盡快通過。至於點解要咁急？葉話呢個議程關乎包括教師職位學位化、校長薪酬重疊等結構性問題，如果政府全面學位化未能實行，將會影響小學教育生態。

財會大量議程積壓

葉喺文中表示，撥款文件原定於上年七月五日於財委會會議上討論。但暴力示威者喺上年七月一日衝擊立法會大樓，大樓設施受損，包括財委會在內嘅全部會議都取消晒，大樓直到同年十月中先至開番咋！財委會依家積壓唔少議程，主席陳健波先前話可能要加會加到本屆會期結束，都未能處理所有議程，葉呢個議程都唔知要排到幾時，佢話惟有去信張建宗，要求將涉及全面學位化嘅事宜擺番入財委會議程，仲話每次見到張都會繼續反映。