中環出更：飲得健康 勞富文用石墨烯製水杯
要建立一個品牌並唔容易，做到家喻戶曉、受人歡迎就更難。日前香港名牌頒獎典禮嘉許本港優秀品牌，其中一間得獎公司就係曾獲世界傑出華人獎嘅勞富文嘅公司喇。勞話，公司原本經營嬰幼兒用品，其後佢成為全球第一位採用石墨烯製成水杯嘅人，呢款水杯可使食水透過石墨烯釋放遠紅外線，讓水分子團折小，出入身體細胞之間，有助加快新陳代謝，仲可以治療高血壓同痛風等。勞仲話，飲水飲得健康，對身體有好大幫助喎。
勞富文被問到點解會有呢個設計念頭時話，佢細個去沙灘游水時，口渴就走去飲山水，試過飲完之後先發現水嘅源頭係一個養豬場，之後就肚痛到要食藥先掂，所以佢長大後就去研究食水，認為飲水飲得健康，對身體係有好大幫助，依家佢去邊度都會帶定私家水杯，方便飲水用。
葉志禮設計按摩產品養生
當日另一名得獎者係經營按摩椅嘅董事總經理葉志禮。葉話，早幾年佢哋幾兄弟經營家品生意，後來發現社會多咗小康之家，開始追求養生，於是佢哋就轉型設計按摩產品。
不過，原來佢自己就唔係咁鍾意按摩嘅，屋企亦都唔會擺按摩椅，因為每次用按摩器材時就會不停度橋諗計，諗吓新設計應該要點做，所以如果屋企都擺按摩椅，就變咗唔使收工喇喎。
何淑賢捐錢助人會更開心
同場仲有家庭社會責任促進會主席何淑賢，佢當日擔任頒獎嘉賓。佢被問到有冇追捧名牌時就話，自己好少刻意去追求名牌，都係用得着先買，覺得將啲錢去幫助有需要嘅人會開心啲咁話。
卓妮