中環出更：容海恩一年抱兩 誕八磅重豬女
立法會議員容海恩（Eunice）去年一月誕下女兒袁昌蔚，成為首位在任期間做咗媽媽嘅立法會議員。事隔唔夠一年，佢再誕下一名豬女，愛女昌蔚話咁快就「升呢」做姐姐喇。Eunice尋日中午就喺社交平台宣布呢個喜訊，留言話︰「Welcome to this world（歡迎來到這個世界），八磅B女出世喇！爸爸媽媽希望妳（你）健康快樂成長」，仲附上與丈夫同細女嘅合照添。
Eunice上載嘅照片可見，Eunice似乎化咗個淡妝，精神奕奕，身為爸爸嘅袁彌昌臉帶微笑，難掩再添一女嘅喜悅，至於主角B女就面圓圓，塊面仲紅卜卜咁，十分可愛。多名議員包括陸頌雄、謝偉銓、陳恒鑌、柯創盛及環境局局長黃錦星等都有留言道賀，當然仲有曾經同袁彌昌、Eunice兩夫婦去咗歎日本菜嘅前立法會議員鄧家彪啦！
前日仲返立會工作
查實Eunice上星期都仲有返立法會出席大會會議兼發言投票，前日亦都有現身立法會，點知尋日就公布誕女喜訊，生B前都顧住工作，真係勤力，唔知佢幾時會返立法會請大家食薑醋呢？
卓妮