政情：八網難逃：顏汶羽玩轉俄羅斯娃娃

適逢聖誕佳節，唔少人都會趁長假期出外旅行，乘機抖吓氣、叉吓電咁。近年都冇喺香港過聖誕嘅觀塘區議員顏汶羽（Frankie），今年就冇睇雪喇，反而同啲黨友飛咗去俄羅斯交流，仲一齊變身成為俄羅斯娃娃添！明明兩個大男人，因乜解究會變咗俄羅斯娃娃呢？

話說Frankie今次去俄羅斯，唔單止四圍去參觀啲王宮同博物館，仲同黨友去咗參觀製作俄羅斯娃娃嘅工廠，睇住由一條木變成一個套一個嘅公仔嘅製作過程。喺觀賞製造過程之餘，佢哋仲有份拎起畫筆為俄羅斯娃娃上色添！Frankie仲話自己成十幾年都冇拎過畫筆，一路畫仲諗起當年喺龍獅節時畫大頭佛嘅過程。

不過，就咁睇，佢哋只係幫啲俄羅斯娃娃上色，最多都係畫出界啫，應該都好難會畫得差嘅，唔知佢哋又滿唔滿意自己嘅作品呢？