政情：峯鴿立會搶手機 調查報告明年六月交大會
民主黨立法會議員許智峯（峯鴿）去年喺立法會大樓內涉搶去政府女高級行政主任手機，最終唔止要鞠躬道歉，仲惹上官非，被法庭裁定普通襲擊等罪名成立，被判二百四十小時社會服務令及罰款三千八百元。立法會就事件成立調查委員會處理，調查委員會尋日開會，主席麥美娟（Alice）喺會後話，委員會已完成搜集資料同研訊嘅工作，預計明年六月就會向立法會大會提交報告。
調查委員會於尋日朝早召開閉門會議，係佢哋嘅第七次會議。Alice會後就話，調查委員會將會開始撰寫報告，期望立法會秘書處可以喺年底假期後完成初稿，屆時調查委員會會再開會討論，希望明年六月可以向大會提交報告。
譴責料走唔甩
發生「峯搶手機」事件後，新民黨立法會議員葉劉淑儀就事件對峯鴿提出譴責議案，並交付調查委員會處理。依家調查委員會工作將完成，睇嚟峯鴿都走唔甩，要面對個譴責議案喇。